Te tāmāaraa na te Mono-Peretiteni o te Fenua Māòhi nei
Ua tere mai te Mono-Peretiteni o te Fenua nei, o Jacqui Tiàmatahi Drollet tāne i te Puna Reo nei e, ua ìtehia i nià i to na hohoà mata ē, ua au maitaì o ia i ta tatou nei pū, na reira atoà hoì te māa tahiti i faaineinehia na na e to na mau taata âpee mai ia Dany Panero, ia Marie-Laure Vanizette, ia Marc Fremy e te feiā atoà i tae mai.
Ua tere mai te Mono-Peretiteni Jacqui Tiàmatahi Drollet tāne i Moorea nei no te hiòpoà i te tahi mau ôpuaraa i te pae o te faariiraa manihini, mai te tahua huiraa pōpō no Moorea, te pū ùtuafare faariiraa manihini Temanoha e, te ôpuaraa nohoraa na te feiā moni a Legend Resorts. Ua faaea mai te Mono-Peretiteni i te Puna Reo nei no te hiò ïa i te mau tapura òhipa i ravehia mai. No te mea e haapiiraa ta te mau tamarii, àita ïa ratou i tià mai i roto i teie farereiraa. Noa atu rā te reira, ua ìte maitaì te Mono-Peretiteni i te òhipa i haahia mai e, ua haapoupou o ia i te mau rautī.
Ua faaìte pāpū atoà te Mono-Peretiteni i mua i te mau veà i te natiraa e vai nei i rōtōpū i te faariiraa manihini e te hiroà tumu. Ìnaha, tei roto roa i te hohonuraa o ta tatou mau peu tupuna te maitaì o te faariiraa na reira atoà te maitaì o te nunaa mäòhi. E nau peu hoì teie i au-rahi-hia e te manihini. No reira, e mea faufaa roa ia òre teie nau peu ia mou. E tuhaa rahi ïa ta te Puna Reo e amo ra no ta na mau tamarii.
