TE RA’I TUA TINI E, UA REVA I TE HAERE-RAA ROA!

Jean Marc Teraituatini PambrunNO TE HAERE'A   O  TERA'I'TUA'TINI PAMBRUN

E TE RA'I TUA TINI E, A VAHI ANA!
E TE RA'I TUA TINI E, A VAHI ANA!
E TE RA'I TUA TINI E, A VAHI ANA!

Ua putua te Rai Tua Tini
Maoa'e Tarava  te mata'i
Ua pee pohotu te ata o te Rai nui  Atea
Te tere no oe e Tera'ituatini!

Ia ti'a te parau e:
Rahu iho ra te Atua i te taata
Puhi iho ra te Aho ora
Ei  meho'i  nona, nona iho
O 'oe e Tera'ituatini i teie nei
O matou ananahi!

Ua tautoo mai 'oe ma te tuutuu ore i te Tau o ta oe i ratere mai
Te Heheu raa mai e te haa-faufaa-raa i to tatou Fau-faa-Tupuna
Noa atu te mau haa tafifi raa e rave rau
Ua Hotu rahi ra te mau Faufaa tumu o to tatou  Hiroa
Ei Papa no to taua Ui hou e no te Ui A-Tau

E Vaa hoe 'atâ  o ta oe i hoe mai,
Ua faa-ruru mai oe e raverahi  mau Matai Puahiohio
Ua rara…Ua rara e ua rara, to oe Vaa; aita ra i taa-huri-e
No te mea e Vaa Tau'ati to oe , e Ta'ere ho'i to taua na Vaa nei
I  ti'a  te parau Paari a to tatou Hui Tupuna  e  na'o e
Te Nunaa e 'aita to na e Papa:  Aita to na e Iho
E 'aita hoi tona e Iho ra  e Nunaa Turori ha noa ia

Mauruuru ra no te mau faufaa o ta' oe i vaiho mai
Faufaa papa'i, faufaa parau, faufaa mana'o…
Ia riro ta 'oe mau tautoo-raa ei taura nape 'avei'a no teie tau manohiti
Ei faufaa a'e no teie nunaa ma'ohi o ta 'oe i here,
O ta oe i pehepehe na e i pehepehe noa!

Haere ra, haere ra, haere ra ma te hau i to varua
Na te Atua hau e hi'i  mai ia 'oe!

Poro'i faatauaroha na Rotui tane, Rotui vahine
E te numaha tamarii o te Puna Reo Piha'e'ina e o te Ao Ma'ohi

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *