Faaànànataeraa na te mau tamarii

(Voir les photos)

Mai te 18 e tae mai i te 22 no Tetepa matahiti 2006, ua faanaho mai te mau rautī o te Puna Reo i te tahi mau faaànànataeraa na te mau tamarii.

Ua haapaòhia mai te tahi mau faanahoraa i te pae o to tatou hiroà tumu. Ìnaha, ua àpa mai te mau tamaroa, ua òri te mau tamahine, ua haapaò mai i te rohipehe e, ua pātaùtaù mai.

Ua haapāutuutu-atoà-hia te tamarii i nià i to na àai. No te haaparaparauraa i te tamarii na roto i to tatou reo, ua faaineine ratou i te haùtiraa ata pēpe hurio.

Na te tamarii iho i pāpaì mai i te hoê àamu na roto i te reo tahiti, na ratou iho i hamani mai i ta ratou mau pēpe hurio, i faatià i te àamu e, na ratou iho i haùti i ta ratou pēpe hurio. Àita te roro uira i haamoèhia, i te mea ē, a taa noa atu te mau haùti, ua rave mai te mau tamarii i ta ratou mau òhipa haapiiraa e ua māìmi ratou i te tahi mau haamāramaramaraa i nià i te rēni nati reva.

Ua tae atoà mai te mau māmā no te tunuraa ïa i te māa no ta tatou mau tamarii.E mata àtaàta tei ìtehia i nià i te hohoà mata o te mau tamarii, i te mea ē, ua riro teie mau faanahoraa ei faaànaànataeraa ia ratou i te mau taime faafaaearaa haapiiraa.