Non classifié(e)

Rururaa tama i Rurutu (Tiurai 2008)

moua_manurevawww2.jpgI teie nei âvaè Tiurai, ua faatupu te Puna Reo i te hoê rururaa tamarii i Rurutu. Mea ruperupe mau te faariiraa i faanahohia mai e te tāàtiraa Moeàveàu e te nunaa iho no teie fenua. Mea ànaànatae maitaì ratou i te haapiiraa mai i ta ratou mau peu tumu o tei faaputapū roa i teie nei mau tama no Moorea.

Tē faatae atu nei i te tāpaò no te mauruuru i te Tavana no Rurutu, o Riveta tāne, na reira atoà i te tomite Toohitu na roto i te faanahoraa mai i te pereòò mataèinaa e te tuuraa mai i te feiā rave òhipa a te Òire no te turu ia matou. Ua puhapa te rururaa i te fare haapiiraa no Moeraì o tē faaterehia mai e Nuupure Riveta vahine.

 Na te amoraa ôfaì i ìriti i teie tere i Rurutu e, na te hoê taureàreà iho no Rurutu i amo i teie ôfaì taipe, 130 kiro i te teiaha. Ua manuia teie tapura òhipa, tāpaò atoà ïa ē, ua manuia te tere. Ua toro te tama i te tarià no te faaroo ia Teìarau Moeiau, o ia te taata pātia tohorā hopeà o te fenua o tei faatià mai i to na àài. Ua taahi roa te âvae i roto i te ana e i nià i te marae. Ua mataìtaì i te mau òri e ua faaroo i te mau himene Rurutu. Ua haapii nahea ia rave i te paeòre e te taofe. Vetahi o teie mau tama, a tahi nei ïa a hī ai i te tarao. Ua paìuma i nià i te mouà Manureva, tara teitei roa aè no Rurutu. tē nā ô ra te parau paari ē: "ia òre òe ia taahi i nià i te tara o teie mouà, àita atoà ïa òe i tae i Rurutu."

 Aita e parau ê atu i te hoìraa mai i te fenua âià maoti rā ïa, te faahiahia. Inaha, ua rau te òhipa o ta te mau tama e faatià e, ua rau te mau hoa o tei fārereihia na i Rurutu. No reira, tē haamauruuru nei te Puna Reo ia Avril, Apera, Hiro, Monia e te mau hoa atoà. Tē tiaì atu nei ia òutou i teie âvaè Titema i mua nei, ia òre hoì te taura o ta tatou i firi àmui na ia mutu. Manava e ia ora.

 

Leave a Reply